Ó mak ha'u nia herói,
Dadur hela iha rai-maran,
Husik hela ita ho laran-kman;
Bainhira dudu ha'u nia bero ba tasi-laran,
Laran-metin tebes nia assegura iha nia laran,
Bainhira ha'u dada sa'e ancor tula hanesan coróa iha nia ulun,
Nia dudu hikas ha'u iha nia mehi rihun,
Tula lerek ancor,
Nia falun ha'u ho amor,
Harí lerek Laan,
Nia fo neon-metin katak ha'u sei manán iha luta kalan;
Bainhira iha navegação,
Hamaluk ha'u iha oração,
Bainhira ita na'in rua halo viagem kalan fahe-rua,
Nakukun kalan nian la fahe it'rua;
Bainhira hasoru tempestade,
Ha'u kaer metin ó no haré ó nia qualidade,
Bainhira laloran si'ak ha'u, ha'u hanoin nia atu tolan hodi mergulha,
Maibé ó iha coragem hatudu maravilha;
Bainhira anin-fuik mai hasé bainhira ha'u hakfuik,
Ha'u nia brani, ó fanun no ha'u nia espírito, ó halulik;
Bainhira kaer lerek iha ó laran ai-baluk,
Halo ó nunca husik hodi hamaluk,
Ita sai tiha ha'u nia taka-baluk,
Sunu ha'u nia tabaku,
Laloran la mai tan ona hodi baku,
Ha'u dulas ó iha kamudin,
Halo laloran hanesan didin,
Haklosok bainhira ó dulas,
Ha'u nia neon tuir deit ho ó nia mundo nebé nakdulas,
Ksolok nebé nunca mohu,
Husi ó ha'u hahú,
No ba nafatin,
Ó mak ha'u nia ksolok fatin.
Hakerek husi Joaquim Soares de Sousa.
02/09/32
No comments:
Post a Comment